عجبتنى كلمه من كلام الورق
النور شرق من بين حروفها و برق
حبيت اشيلها فى قلبى .. قالت حرام
ده انا كل قلب دخلت فيه اتحرق
! عجبى
.
رقبه قزازه و قلبى فيها انحشر
شربت كاس و اتنين و خامس عشر
صاحبت ناس م الخمره ترجع وحوش
و صاحبت ناس من الخمره ترجع بشر
! عجبى
.
يا طير يا عالى فى السما طظ فيك
ماتفتكرشى ربنا مصطفيك
برضك بتاكل دود و للطين تعود
تمص فيه يا حلو و يمص فيك
! عجبى
.
جالك اوان ووقفت موقف وجود
يا تجود بده يا قلبى يا بده تجود
ما حد يقدر يبقى على شيئ
مع ان -عجبى- كل شيئ موجود
! عجبى
.
يا ميت ندامه ع القلوب الخلا
لا محبه فيها ولا كراهه ولا
حتى يا قلبى الحزن معادش فيك
معلهش .. لك يوم برضه راح تتملا
! عجبى
.
انا قلت كلمه و كان لها معنيين
كما بطن واحده و توأمين زى وشين
لو دنيا شر .. التوأم الخير يموت
لو دنيا خير .. الشر ح يعيش منين
! عجبى
.
بره القزاز كان غيم و امطار و برق
مايهمنيش -انا قلت- ولا عندى فرق
غيرت رأيى بعد ساعه زمان
و كنت فى الشارع و فى الجزمه خرق
! عجبى
.
يا عندليب متخافشى من غنوتك
قول شكوتك و احكى عن بلوتك
الغنوه مش ح تموتك انما
كتم الغنا هوا اللى ح يموتك
! عجبى
.
غمض عينيك و ارقص بخفه و دلع
الدنيا هى الشابه و انت الجدع
تشوف رشاقه خطوتك تعبدك
و انت لو بصيت لرجليك .... تقع
! عجبى
.
ولدى نصحتك لما صوتى اتنبح
ما تخفشى من جنى ولا من شبح
و ان هب فيك عفريت قتيل يوم اسأله
ما دافعش ليه عن نفسه يوم ما اندبح
! عجبى
0 commentat:
Post a Comment