- 2

اللى بكتبه ده كلام غرضه السخريه فقط , متجيش تحاسبنى و تقوللى أنا مش فاهم الأحداث و تهت فى المولد ده , مفيش أحداث مهمه , مجرد حوارات ساخرة بين شخصيات , إيه المشكله
بالمناسبه , ده آخر جزء فى السلسله العبقريه ( 14 - ) , إنتظروا السلسله القادمه
( زعابيب فى تل أبيب )

samir

-2

داخل الكهف السرى تحت سطح الأرض , رقد شبح ما على الأرض لا يظهر عليه أى وجه من أوجه الحياه , مستندا بظهره للحائط , و أمامه ثلاث جثث راقده على الأرض تتقلب بين الحين و الآخر
و فجأه يقتحم زغلول و سها الكهف شاهرا كل منهما المدفع الآلى ( المغاورى77 ) فخر إنتاج مصانع السلاح الحربيه المصريه , مع تحيات الهيئه العربيه للتصنيع

زغلوله : إثبت مكانك منك ليه لوه لوه
كرواتيا : كله يرمى سلاحه , كله ينام عالأرض
زغلوله : صعبان عليا الواد , شيل الواد مـ الأرض , الواد عطشان إسقوه , إدى الـ ... ـ
كرواتيا : المكان محاصر بالمقاتلات الحربيه المصريه , مفيش داعى للمقاومه
الجثه المسـتـنده للحائط : شششت , عرفنا خلاص
زغلوله (صافعا الجثه) : رد عـ الهانم عدل يا ........ ـ

و لم تكتمل صفعة زغلوله , فقد تحركت الجثه بسرعة البرق قبل أن تهوى يد زغلوله , ففى لمح البصر وجد زغلوله نفسه مقيدا إلى صخره ثقيله بمجموعه من الجنازير الحديديه , و الجثه واقفة إلى جواره حاملة مدفعه المغاورى , و فى يدها الأخرى إستقرت محفظة زغلوله , كل هذا و يد زغلوله لما تكمل مرحلة الهبوط بعد

كرواتيا : مذهل
زغلوله : مستحيل
الجثـــه : أنا بابا يلا ..... ـ

فقد كانت الجثه آخر شخص يتوقعان وجوده
آخر شخص على الإطلاق

كرواتيا : أدهم باشا , إمسحها فـ كمى المره دى يا باشا
أدهـــــم : لا لا لا لا , الواد ده غلط و لازم يتربى , إنت شكلك سوابق على فكره
ــــــــــــــ: حظكم إنى مستنى فرقة العمليات الخاصه , و دلوقتى يا شاطرة خدى أبو كف
ــــــــــــــــ رقيق و صغنن ده فـ إيدك و إتطرقوا
زغلوله : إممممممم .. إحم
أدهـــــم : نفسك تقول حاجة يا نحنوح ؟
كرواتيا : كنا عايزين نقول لجنابك يعنى , هات ودنك يا باشا
ــــــــــــ : البيجى بيجى بيروح و ييجى , و الـ .......

و قبل أن تتم سها العباره الشفريه , إرتفع حاجبا أدهم فى دهشه شديده
شديده
شديده

كرواتيا : مالك يا أدهم باشا ؟
أدهــــم : علبة السجاير إتبلت لما كنت فى الطشت , كملى كلمة السر
كرواتيا : البيجى بيجى , بيروح و ييجى , و الميكى ميكى , بيروح للميكانيكى
أدهــــم : ألاقيش معاك سوجاره يا كابتن ؟
زغلوله : يا باشا عيب عليك , إنت لو طلبت حشيش العصفور نجيبهولك , مساء الفل
أدهــــم : مساء القشده
ــــــــــــ : ألا مقولتليش يا أبو الزغاليل , مين البرنس اللى بيكتب قصتى المره دى ؟
زغلوله : ده عيل صاحبى , بس واد كفائه يا أدهم باشا , يجيب الكلمه من بق الأسد
أدهــــم : آه و الله يا ابنى , أنا قاعد مع نبيل فاروق من سنة 86 , مفيش مره نزللى فيها
ـــــــــــــــ حجر وللا حتى جابلى بق كابوشتيتو , يوم ما رضى عنى قعدنى أنا و منى تلفيق
ـــــــــــــــ فى كازينو فى الهرم , و بعديها بخمس دقايق دخلنى فـ غيبوبه
ـــــــــــــ : أغمن عليا يعنى
زغلوله : ده إنت متكحرت يا أدهم باشا , طيب حتى يراعوا تاريخك الوطنى المجيد
أدهــــم : لأ , و كمان كل قصه يطلعنى منها بخمس ست رصاصات فى فخدتى اليمين وللا
ــــــــــــــ فـ كتفى لما إتعميت يا زغزغ
ــــــــــــ : كان فى مره عايز ياكل عليا مرتب شهر , أنا إتزربنت عليه و طقمتله , مفيش
ـــــــــــــــ فى القصه اللى بعديها على طول لبٌنى رصاصه فى رئتى و من ساعتها و أنا
ــــــــــــــ مبشتغلش فى العمليات الخارجيه
زغلوله : أمال دلوقتى مشغلك فين يا أدهم باشا ؟
أدهـــــم : نقلنى قسم الدرب الأحمر
زغلوله : ده إنت حاتلك كرٌفْ يا أدهم باشا
ــــــــــــ : بس ولا يهمك يا باشا , لو عايزنى أخلى الواد سمير يكتبلك مغامره فى شرم
ـــــــــــــــ دلوقتى أنا رقبتى يا أدهم باشا
أدهــــم : و الله يا أبو الزغازيغ تبقى عملت فيا جميله * ـ

*ــــــــــــــــــــــــــــــــــــــــــــــ
زغلوله : أبو سمير , حبى الأول و الأخير , مساء الفل
سميـــر : زغزغه , يعنى هوا الواحد لازم يكتبك علشان يقابلك يا معفن ؟
زغلوله : أبو سمير , معايا النهارده ضيف مش هتصدق مين
سميـــر : مين ؟
أدهـــــم : أنا بابا يلا

وبعد مناقشه قصيره , تخللتها بضعة صفعات , نجح أدهم و زغلول فى إقناع سمير بوجهه نظرهما
*ــــــــــــــــــــــــــــــــــــــــــــــ

فى مكان ما من شاطئ فندق سياحى فاخر بشرم الشيخ , إستلقى أدهم و زغلول على كرسيي بحر يتأملان الشاطئ الممتد أمامهما على مرمى البصر , و آشعة غروب الشمس تلقى بظلالها على الـ ........ ـ

**ــــــــــــــــــــــــــــــــــــــــــــــ
أدهــم : غروب ايه بس يا ابو المسامير , ده أنا بقول عليك فاهمنى
سمير : مساء التفاح
أدهــم : أهو كده إنت فهمتنى
**ــــــــــــــــــــــــــــــــــــــــــــــ

فى أحد مقاهى شرم الشيخ , جلس أدهم و زغلول يدخنان الشيشه بمنتهى الإستمتاع

أدهــــم : جووووووووون
زغلوله :هاكل البطيخ بدل المانجه , هاكل البطيخ بدل المانجه
أدهــــم : الأهلى غيره مفيش , و دبحنا الخفافيش
ــــــــــــ : هيا دى الحياه

ترى هل يستطيع الأهلى أن يسحق الإسماعيلى فى الموسم القادم أيضا ؟
ما هو سر عماد برقوق , أمين شرطة السياحه بشرم الشيخ ؟
لماذا تم القبض على أدهم و زغلوله فى قسم أول شرم الشيخ ؟
هل ينجح أدهم فى مواجهة برقوق , أم تكون النهايه ؟
نهاية الرجل ..... ـ
رجل المستحيل

samir
1-6-2009

Share