رساله - أحمد فؤاد نجم

ماليش نفس أكتب أى بتنجان , يبقى الحل هو الشعر
مش الشعر بتاع السنتحه و الفرفره وهوا إنت بقى اللى نفسك حاحا
القصيده للشاعر أحمد فؤاد نجم طبعاغنى عن التعريف , لكن القصيده وطنيه و بعيده عن ( البتاع )
لتستمتع بالقصيده

رساله

.
وآه يا عبد الودود
يا رابص ع الحدود
و محافظ ع النظام
كيفك يا واد صحيح
عسى الله تكون مليح
و راجب للأمام
أمك ع تدعى ليك
و ع تسلم عليك
و تجول بعد السلام
خليك ددع لابوك
ليجولوا منين دابوك
و يمصخوا الكلام
.
وآه عبد الودود
ع أجولك و انتخابر
كل الجضيه عاد
و لسه دم خيك
ما شرباش التراب
حسك عينك تزحزح
يدك عن الزناد
خليك يا عبده راصد
لساعه الحساب
آن الأوان يا ولدى
ما عاد إلا المعاد
تنفض الشركه واصل
و ينزاحوا الكلاب
إن كنت ود ابوك
تديب لى تار أخوك
و الأهل يبلغوك
دميعا السلام
.
واه يا عبد الودود
كيفك و كيف زمايلك
عسى الله طيبين
خالك زناتى
داى لك
ضمن المتطوعين
و اختك تطلع يوماتى
ع المشتشفى الجديمه
حاكم ع يمرنوها
فى العركه تكون حكيمه
و محمدين موافى
يتعلم المطافى
و يجولك شد عزمك
و يجولك العوافى
و من هنا الجرايب
و العيله و العيال
ع يبلغوك سلامهم
و لتمه الرجال
و آخر الكلام
نجول لك فى الختام
الله يصون بلدنا
و يحرس السلام
والدك / حسن محارب
غفير برج الحمام

أحمد فؤاد نجم
القاهره 9 يونيو 1967
القصيده من كتاب - أحمد فؤاد نجم .. الأعمال الشعريه الكامله
دار ميريت , القاهره 2005
قصيده ولا أروع , ولا أحلى , ولا أمتع

arni
26-3-2009

Share