الفصل الثالث
! بدون عنوان
.
احيانا ما تجـ ..... لأ مش احيانا
عاده ما تـ ..... لأ برضه مش عاده
غالبا ما ..... يوووووووووووه
دائما ما تجد يا ابنى , وسواس سخيف يراودك من الحين للأخر ... ـ
( هوا انا هييجى عليا يوم و ابقى مهندس عليه القيمه كده ؟؟ )
فتجد نفسك تلقائيا ما تجيب عن التساؤل بـ
( ! .. ده عند ام ترتر يا حماده )
كل المشكله , من وجهه نظرى على الاقل , انك محتاج تاخد جرعه ثقه بالنفس
.....
اه بس متسوقشى فيها لحسن يبقى اسمك واخد شلوط فى نفسك
..
ايواااااااان , بالظبط
.
مش لازم علشان تبقى مهندس تبقى ابو العريف و تعرف دبه النمله و خطوه السحليه
و الكلام الفاضى ده , و بالاخص فى قسم مدنى
لأن الشغل فى مدنى اغلبه يعتمد على الخبره , و متقلقش , الخبره دى هتيجى هتيجى
.
برضه مش عايزك تخاف من اى حاجه ولا من كلام الناس , اللى يقول سيبه يتنيل يقول
بس اعمل انت بس اللى عليك بأقصى درجه اجاده ممكنه , و دايما شغل دماغك
.
و افتكر دايما ان الجاهل مسيره يعرف , لكن الغبى هيفضل طول عمره يتصبح على قفاه
.....
شكلك مش مصدقنى
عموما اسمع الحدوته دى , يمكن تحس شويه انك مش البطيخه الوحيده فى الكون يعنى
و ان العالم مليان ناس لا تفقه شيئ فى البتنجان
.
مستشفى النيل بدراوى
.
لو انت من سكان جنوب القاهره ( معادى - حلوان ) و رايح على وسط البلد من
الكورنيش بعد المعادى بشويه هتلاقى صرح عظيم , اسمه مستشفى النيل بدراوى
.
مستشفى النيل بدراوى للى ميعرفوهاش عباره عن مبنى على شكل نصف دائره تقريبا
ولو انت قوى الملاحظه هتلاحظ ان فى ونش واقف فى منتصف المستشفى تماما , ونش
كده يا اخى تحسه تايه , لا بيتحرك ولا بيتنيل ..... الله ؟؟
.
القصه بدون اطاله تتلخص فى ان الونش عند بناء المستشفى كان واقف جوا الدايره
الغير مغلقه , و يوم ورا يوم الدايره عماله تصغر .. تصغر ... تصغر
.
لحد ما فى يوم من الايام اكتشف واحد - عبقرى - من الشغالين فى الموقع ان هندسيا
الدايره اتقفلت حوالين الونش و انه اصبح مسجون جوا المبنى
.
متخيل ؟؟
اعداد من الاستشاريين و عشرات المهندسين و مئات العمال و الاف المتطفلين اللى
بيتنططوا فى مواقع الشغل , كل دول متنبهوش للوضع الحرج اللى الونش واقف فيه
غير بعد فوات الاوان
.
عموما , كل ما تعدى على الكورنيش , هدى شويه قبل مستشفى النيل بدراوى و اتأكد
بنفسك من الونش , لأننى لما سمعت القصه دى من واحد مصدقتهاش
و لما سمعتها من واحد تانى برضه مصدقتهاش
و لما رحت و شفت الونش واقف زى خيال المآته برضه مصدقتهاش
حتى لغايه دلوقتى انا مش مصدق
....
بالهنا و الشفا
و دايما افتكر صلاح جاهين لما قاللك
.
سهير ليالى و ياما لفيت و طفـــــــــــــت
و ف ليله راجع فى الضلام قمت شفـــت
الخوف , كأنه كلب سد الطريق
و ف ليله راجع فى الضلام قمت شفـــت
الخوف , كأنه كلب سد الطريق
و كنت عاوز اقتله .. بس خفــــــــــــــت
! عجبى
.
ايه علاقه ده بموضوعنا ؟؟
الحدق يفهم يا هندزه
.
arni
14-3-2008
1 commentat:
Hello. This post is likeable, and your blog is very interesting, congratulations :-). I will add in my blogroll =). If possible gives a last there on my blog, it is about the Fragmentadora de Papel, I hope you enjoy. The address is http://fragmentadora-de-papel.blogspot.com. A hug.
Post a Comment