GYMawy

تنتابنى حاليا حاله , زى ما تقول كده خمول , زهق , قرف , تناحه , سهتنه , على غير العاده و الأسباب كتير , بعدى عن التصميم و بعدى عن الرياضه و الحركه بشكل عام لأنى قاعد الفتره دى فى البيت , اكبر مجهود بعمله هو طرقعه صوابعى , بجد مفتقد الجيم و التمرين حديده حديده و جهاز جهاز

الجيم ده ذكريات , يا سلااااااااااااام

فى الأول

كلنا فى مرحله ما كان همنا هو العضلات و القوه و الكلام ده , لكن قليل لما واحد يحاول و اقل اللى بيستمر فى الإهتمام بالموضوع , معظم الناس بتكبر دماغها , بس انا جيت فى اغسطس 2007 بدأت اواظب على التمرين بشكل يومى فى الجيم

اللى كان مكرهنى فى نفسى هيا التعليقات الظريفه بين قوسين السخيفه

- محمد , انت تقرب للأستاذ ميكى ماوس ؟
- يا عم روح كده و انت شبه المقشه المحروقه / البقسماطه المحروقه
- محمد , انا جبتلك كيس محلول جفاف هديه
- يا محمد انت كرشك طالع لجوه
- كتافك يا محمد عاملين زى كتاف الفرخه

محمد الجديد

فى البدايه طبعا كنت رايح و انا مفرقش عن البطيخه كتير , لا عارف اتمرن ازاى ولا حتى عارف اتعامل ازاى مع الأجهزه ولا اى حاجه خالص , لكن الحمد لله كان احمد صاحبى بيروح الجيم من قبلى بفتره , فكنت بلزقله هناك و نتمرن سوا

فى البدايه , كان وزنى 58 كيلو , و طولى 183 سم , فمكنتش بلفت نظر حد من الناس فى الجيم ابدا , فكنت مسجل خطر كتاكيت فى الصاله

فى البدايه كانت تمرينتى عباره عن 3.5 ساعه , زمن طويل جدا بالنسبه للتمرين , و مش شطاره اننى كنت بقعد الوقت ده كله , لكننى كنت اهبل , بروح الجيم من بعد العصر , و ارجع بعد المغرب بشويه , احمد كان قعد معايا بتاع اسبوعين تلاته و مبقاش ييجى , فبقيت اتمرن مع نفسى , من شهر 8/2007 لحد شهر 3/2008 كنت مواظب على التمرين كل يوم لكن فى بدايه شهر 3 لقيت نفسى قعدت فى البيت و حلقت للتمرين , و مش عارف ليه بس اكيد بسبب الكسل

فى الفتره دى مكنتش فرقت كتير , مجرد بس بقي جسمى مشدود شويه و ضهرى اتظبط شويه و بدأت كتافى تتظبط شويه, ووزنى زاد بتاع 5 كيلو , لكن مع التوقف فى شهر مارس كل ده راح , ورجع وزنى زى ما كان فى خلال اسبوعين تلاته

العوده

فى الأجازه كسٌلت انزل الجيم , لكن الولا عاطف بدأ يحمسنى , قعد يزن على دماغى و فعلا رحت معاه اسبوعين قبل ما اسافر بس بعد ما رجعت من السفر مرجعتش الجيم تانى

المهم , عقدت النيه انه بعد شهر رمضان ارجع تانى , بس دى عوده هتبقى ولا عوده باتمان و الأربعين حرامى , دى هتبقى معمعه , و اكتب يا تاريخ واشهد يا زمان

رمضان ولٌى و رجعت الجيم , رجوعى كان يختلف كتييير جدا عن بدايتى اول مره , مع اننى كنت نفس الوزن , لكننى كنت عارف انا بعمل ايه

اخدت فتره احماء 3 ايام , و اسبوع بعدها بلعب بأوزان اقل من اللى اقدر اشيله , انا عارف لما الواحد بيلعب بأوزان خفيفه فى الصاله بيبقى شكله وحش و بيبقى مكسوف قدام الناس لكن انا اصلا فى التمرين معرفش ابويا , ميهمنيش اللى يتريق يتريق , بس انا مش هفرح بنفسى لما تجيلى اصابه

و الإصابات فى الجيم , اللهم احفظنا , مش واوا و كلام فاضى من بتاع الكوره ده , الاصابات بتبقى على شكل جزع فى المفاصل , تمزق عضلات , مفاصل بتخرج من مكانها , ده غيرالهبوط فى الدوره الدمويه لو بتتمرن من غير اكل , ده غير اصابات
اتهبٌد على صدرك , و انت bar وقع على رجلك , الـ dumble الغباوه فى التمرين ,
اتقطع و الحديد نزل على دماغك wire بتتمرن الـ

ساعتها ارتبطت مواعيد تمرينى بمواعيد تمرين عاطف , بنتمرن سوا و عايشين حياتنا , بس اللى ينشك فى شعر دقنه كان عامل زى الجاموسه , بيشيل اوزان اتقل من الأوزان اللى بشيلها الضعف و احيانا الأربع أضعاف , اى نعم كان صعبان عليا نفسى علشان طوفى بيشيل اكتر مننى لكن برضه مشيلتش فى دماغى , و بقيت اتمرن و اتلافى كل الهبل اللى كنت بعمله زمان و اتمرن التمارين صح , و اضغط على نفسى علشان ازود الأحمال , و اتمرن زى الزمبلك و مقعدش استريح بين كل تمرين و تمرين

بااااااااااااااااااس

بدأ وزنى يزيد زياده ملحوظه , و جسمى يتشكل بمعدل اسرع من اللى فات , و بدأت الأوزان اللى بشيلها تزيد , وزنى بعد ما كان 58 لقيت نفسى بلعب فى الـ 75 كيلو , و بدأت التعليقات على مظهرى تسعدنى مع انها كانت سخيفه برضه

- الله يحرقك يا محمد , بقيت عامل زى الدبه
- محمد .... انت طخنت ؟
- امشى زى الناس يا حماضه و متعرضٌهاش
- انت و زيكا اكبر اجسام ماشيه معانا , و أهطل ناس ماشيه معانا على التوازى
- بطل بقى ضرب الحقن و الباودر ..... يا سرنجاتى

التعليق الأخير ده على قد ما هو اسخفهم و بيستخف بمجهودى طول الشهور دى , لكن اكتر تعليق فيهم بيدينى اجمل احساس فى الكون , انك تركب حلزون ....

من سنه كانو بيضربوا بيا المثل فى العصعصه , دلوقتى الحال انعكس 180° لصالحى

arni
16-1-2009

Share