ألواح من البشر

المعتوه

جميل إنك تحط كل بنى آدم فى حجمه الطبيعى
لكن مع عاطف , مش هتقدر تلاقى مكان على قده تحطه فيه , لذلك هضطر افصصه فصافيص و أنشر كل بلوه من بلاويه فى مجلد منفصل
ابو عاصف , كل اللى هكتبه دلوقتى أنا قلتهولك قبل كده كتير , فمتضايقش نفسك , الهدف بس إن أى حد شبهك يحاول يكتشف بسرعه انه فى الطريق للهاويه و يحاول ينقذ نفسه , ده لو فى حد شبهك أصلا

- راس الفساد

أول مره أشوف أفكار متجلخه فى مخ بنى آدم زى ما شفتها مع عاصف , أى نعم شفت الأفكار دى قبل كده كتير , بس كلها أفكار ناس غير ناضجين و بتختفى على طول بنضج الإنسان المستمر , لكن مع راس البصله ده , مش ممكن تتوقع ايه اللى هيحصل كمان ثانيتين , مثلا أفكاره , الأغانى اللى بيسمعها , إهتماماته , أسلوب حياته .. مهما تقول من الصفات على قفا مين يشيل

- ننوس عين بابى

عرفت عاتف فى إبتدائى , صوره للطالب المثالى كما يمكن أن تتخيلها , شعر قصير بنى متسرح على جنب , مربرب و الغذا باين فى سحنته , هدومه كلها نضيفه و كتبه و أقلامه نضيفه دايما , مبيحبش يجرى ولا يتشقلب زى كافة العيال , الخلاصه كان بالنسبه لى كائن فضائى مستحمى
مكانتش علاقه أساسا , مجرد كلمته مره ولا مرتين و روحنا مع بعض مره وللا بتاع

رجعت قابلته تانى فى ثانوى , بس كان بدأ يتحول لكائن طبيعى بيتكلم و بيضحك , لكنه دايما كان بيفكرنى بالبطه بسبب كل الهدوم اللى بيلبسها و كرشه المربرب و قدرته على الجرى و التنطيط المعدومه , بس كان شغال عادى

عاطف قرر يدخل علمى علوم علشان يدخل كليه التب ويشاء القدر انه يفشل فى تانيه و يحول لعملى رياضه علشان يلحق مكان فى كليه الهندسه , كليه الكمه
و الله كان هيبقى لايق عليه الدكتره , كل طلبة تب نفس القطعيه بتاعة عاطف كده , لكن مش مشكله , أهو دخل هندسة حلوان , التطور الطبيعى للحاجه الساقعه
من ساعة ما دخل كلية المعاتيه اللى دخلها دى و الواد إتقلب , الأفكار المتجلفنه فى دماغى إزدادت جلفنه , و تصرفات الأطفال بتاعته بقت لا تطاق

مره بكلمه عن موضوع كهربى بصفته فى قسم هندسه الكهرباء , الموضوع كان عن نظرية الموصلات الفائقه التوصيل

SuperConductors سمير : ولا يا عاصف , أنا عملت تقرير عن الـ
SemiConductors عاتف : يا غبى , إسمها الـ
سمير : لأ يا بقرى , أنا بتكلم عن المواد فائقة التوصيل , مش أشباه الموصلات
ـــــــــ : ألمواد دى هتعمل ثوره فى الطاقه قريب , تعرف إن الخزف فى الفتره اللى جايه
ــــــــــــ هيبقى الموصل فائق التوصيل الأول
عاتف : الخزف ؟
سمير : اه , دى هتبقى ثوره , و اللى ما يشترى يتصرف
عاتف : أهو ده اللى بناخده من الزلنطحيه اللى بيدخوا مدنى , ياض يا زلطه انت أخرك
ـــــــــــــ تقعد على كومة رمل تعد شكاير الأسمنت , وللا تشوفلك قصعه تشيلها على قفاك
ــــــــــــ بدل ما انت قاعد كده لا شغله ولا مريله
سمير : يا بنى آدم اسمعنى للآخر
عاتف : مسمعش , إنت مالك إنت و مال العلم يا زلطاوى , إخرس و سيب العلم لناسه

- الجلمف

عطفطف : أنا قررت أكون مخترع عبقرى
عطفطف : انا قررت أكون مصمم كبير
عطفطف : أنا قررت أكون بلوجاوى محصلش
عطفطف : أنا قررت أعمل فرقة مزيكا و هسميها فرقة زمبلكاويات
عطفطف : أنا قررت ألعب حديد و ابقى ولا الشحات معذور

عاطف على مدار السنتين اللى فاتوا معرفش يملا فراغه بأى هوايه , أى حاجه مفيده

فى البدايه كان فرحان بنفسه , كونه الباشمهندس العبقرى اللى دخل قسم الكهربا و حب يعمل فيها عالم , قعد يتكلم شويه كده و يسيح لنفسه على السى ++ , بس فى الآخر ربنا هداه و بطل
بعديها عاطف لقانى مهتم بالتصميم , قال إشمعنى أنا ؟ أنا كمان عايز أصمم و طلب منى برامج و دروس علشان يبدأ الإنطلاق , عرفته على مواقع تصميم و قلتله هساعدك و مش عارف إيه , تانى يوم كان عمل تصميم أهبل جدا و طلب رأيى

عطفطف : أبو سمير , إيه رأيك فى التصميم النووى العبقرى الصاروخى ده ؟
سميـــــر : تصميم زباله زيك , لسه يا ابنى طريق التصميم عايز وقت و مجهود كبير
ـــــــــــــــــ مش كل حمار هيطبق درسين هيبقى جاب الديب من قفاه
عطفطف : إنت حيوان , و غور إنت و التصميم بتاعك ده فـ داهيه
سميـــــر : يا عاطف انا بس قصدى ..... ـ
عطفطف : إخرس يا كلب , إطلع بره
سميـــــر : آ ...... ـ
عطفطف : إخرس

بعدها شاف الناس عاملين بلوجات , عجبته العمليه قوى , و عمل بلوج , و بدأ يكتب فيها هبليات من بتاعته , و يا ريته إستمر فى كتابة الهبليات , لأ ده قعد جمب البلوج يهش الذباب و فاكرها هتطرح مواضيع آخر الموسم

بعدها راح دفع تحويشة عمره فى جيتار و قعد رايح جاى بيه , على إنه الموسيقار العالمى , عاطف شمه

آخر فتره كنت بزن على ودنه علشان يمارس رياضه , أى رياضه , بس بما إننى كنت بروح الجيم , كنت بنصحه ييجى معايا , و فى النهايه إقتنع و وافق ييجى معايا , من ساعتها و هوا الجيم ده أغلى عنده من عينيه , و عاش فى دور الرياضى الأول
اللى الناس متعرفهوش عن عاطف إنه بيتمرن على مزاجه , يعنى فى الإسبوع ممكن يتمرن 5 تمرينات صدر مثلا و ميتمرنش ولا تمرين ضهر , عزيمه مخوخه , و شلوط محترم فى نفسه , التمرين ساعتين , بيقضى منهم ساعه و نص فى البص على نفسه فى المرايه , طيب أنا راضى ذمتك , ده جسم منتظر منه إيه فى أول ست شهور تمرين ؟

طبعا مفيش داعى إننى أتكلم عن حوار فتاة ساقية الصاوى , علشان ربنا حليم ستار
ولا فيش داعى أتكلم عن حادثة العربيه الفيورا بتاعة دادى
لكل ما سبق , إستحق عاطف هذا الفصل المتميز من سلسلة ( ألواح من البشر ) ـ

و السلام حمام

arni
26-5-2006

Share