Friday, May 4, 2007

انتقام الجبابره

الناس يتحدثون
يتهامسون
يتسائلون
عن سر غضبه الدكتور كمال ووعيده بخراب بيوتنا فى امتحان
فى امتحان قد نودع معه الحياه الجامعيه
ترى ما هى الحكايه ؟؟
الحكايه .... فى حديث ام دينا
.
انا :كنت انا و الواد زغلوله رايحين فى امان الله نحضر محاضره المساحه و اخر فل و مروقين نفسينا على الاخر , دخلنالك المحاضره من هنا و لقينالك دكتور كمال بأبتسامته و شنبه المتساوى و قميصه و بنطلونه و لابتوبه ... نجم سيما و النبى
و بمنتهى الهدوء بدأ كلامه
.
د.كمال : عارفين يا ولاد انا الاسبوع اللى فات حصلت منكم عمله خلتنى اتنرفز و قلت انا هعمل امتحان و اسقطكم كلكم
نفر1 : خير يا دكتور
د.كمال : انا مش هقول على اللى حصل دلوقتى لكن اوعدكم اننى اقولهولكم الاسبوع الجاى , و على فكره انا تعمدت
مقصوده يعنى , mail امبارح على الـ slides مبعتش الـ
نفر2 : طيب يا دكتور احنا عملنا ايه بس
د.كمال : هيا حركه قرعه ... هتعرفوها الاسبوع الجاى زى ما قلتلكم
د.كمال : نبدأ بقى فى المحاضره بتاعتنا
.
زغلوله : و خرجنا من المحاضره لا عارفين هنعمل ايه ولا حتى هيتعمل فينا ايه
انا : لكن حسب اللى جالنا من مصادرنا .... دكتور كمال و الله اعلم اكتشف وجود ملازم للجزء بتاعه بتتباع للعيال فى المكتبات اللى حوالين الكليه
زغلوله : مصادرنا قالت كده ؟؟
انا : يعنى بأتبلى عليك مثلا ؟؟
زغلوله : بلا اتبلى بلا اتنشف ... كمل كمل ... بلا كلام فاضى
انا : المهم بناء على المعلومه الصغنونه دى ممكن نبنى عليها استنتاج جوهرى توصلناله بعد تفكير عميق و تحليل مدروس لشخصيه دكتور كمال و طبقا للأحصاءات اللى جاتلنا من مصادرنا
زغلوله : هيا مصادرنا بعتت احصاءات ؟؟
انا : ممكن تخرس و تسيبنى اتنيل اكمل ؟؟
زغلوله : اتفضل ... قال مصادر قال ... هأو
انا : الخطه الافتراضيه اللى وصلنالها بتقول الاتى
.
دكتور كمال بعد ما اكتشف الواقعه هيحاول يتدارك الامر بأنه يغير اجزاء فى المنهج عن السنين اللى فاتت او يعمل نظام جديد للأسئله اللى هيحطها فى الامتحان
و ده اللى بيأكده انه مأعلنشى عن الحكايه الاسبوع اللى فات و استنى اسبوع علشان يقولها .... معنى كده انه فعلا بدأ يحط الامتحان حسب القواعد الجديده اللى عملها ... هدف الخطه يتلخص فى انه يضرب العيال اللى اشتروا الورق شلوط ارض-ارض يخليهم يعرفوا قيمه المحاضرات اللى بيكتٌوا منها دى
.
زغلوله : يخرب بيتك ... انت جبت الكلام ده منين ؟؟
انا : من مصادرنا طبعا
زغلوله : طيب انا عندى فكره بمليون جنيه
انا : افتى يا ابن بتاع الجزر
زغلوله : لو احنا قدرنا نتعاقد مع مجرم محترف يسرقلنا نسخه من الامتحان , و نبيع بعد كده احنا النسخه قبل الامتحان بيوم .. سعر النسخه بقى اضرب زى ما انت عايز يا معلم
انا : يا ابن اللعيبه ... بس هنجيب منين المجرم المحترف ده ؟؟
زغلوله : سيب ده عليا انا ... انا اعرف واحد قريبنا ممكن يخلصلنا الشغلانه
انا : قريبكوا ؟؟
زغلوله : آآآ ... قصدى يعنى جارنا من بعيد
انا : و شيخ المنصر ده هيعملها بنضافه وللا زناخه مخ عيلتكم عنده هوا كمان ؟؟
زغلوله : يا ابنى انت عمرك ما سمعت عن اسطوره فتح الخزن ... اخصائى النشل ... استشارى اعمال التهريب ... استاذ مساعد خطف الاطفال بمؤسسه بيك بوكيت الامريكيه و مدير عام قطاع الاعمال التفجيريه بتنظيم القاعده ؟؟
انا : لأ
زغلوله : طيب اسكت بقى و النبى
انا : طيب ممكن اعرف اسمه ايه ؟؟
زغلوله : ده سر يا فالح
.
.
انا : المهم فى النهايه ان يوم الاتنين الجاى فى محاضره المساحه هنعرف اذا كان دكتور كمال فعلا هينفذ اللى توقعناه وللا هنضطر نغير مصادرنا
زغلوله : اقولكشى حاجه حلوه ؟؟
انا : يا ريت
زغلوله : بثبوثه

arni
4/5/2007

1 commentat:

Anonymous said...

ياباشا انت جامد اخر حاجة يارب تفضل كده على طول و العرض بس متنساش مذاكرتك و شد حيلك
أحد منكوبى النتيجه
أحمد حمدى
Sec 1