Monday, December 8, 2008

فى الأوتوبيس ... 2

ماشى يا سيدى , طلعت الأوتوبيس و قعدت فى الكرسى اللى حاجزه و طبعا لما محمد سمير يحجز كرسى , يبقى الكرسى ده جنب الشباك فى أول صف , علشان يشوف المنظر من الجانبى من الشباك ويشوف المنظر الأمامى من النافذه الأماميه الواسعه ... ده لو الخواجات شموا خبر عنك ياض يا محمد , عليا النعمه مش بعيد تلاقى عندك عقد عمل فى مباحث لندن وللا قسم اول نيويورك

آآآآآ ... هوا مش عبقريه قوى يعنى , هوا الحجز جاء بالحظ اصلا

المشكله مين بقى اللى هيقعد جنبى , يااااااااااارب ما يكون شخص ممل , و يا حبذا لو كان اخرس او فاقد النطق او مصاب بأى نوع من الإعاقه تمنعه عن الكلام و الدوشه

مين بقى اللى قعد جنبى .... ست كده قول 30 سنه وللا بتاع , و معاها ولد و بنت قول 3 سنين , و المفترض انها هتاخدهم على رجلها طول الطريق لحد الغردقه ... الرحمه يا ربى هتتعبى نفسك و تتعبى العيال طول الـ 6 ساعات اللى هتسافرى فيهم يا بنتى

عموما انا عملت ما تمليه عليا اصول الشنتل مان و قعدتها جنب الشباك علشان تسند و تستكنيص , و عرضت عليها انها تقعد واحد من الاتنين فى النص بس هيا قالت لأ مش مهم , ماشى يا ستى اى خدمه

انا ( فى سرى ) : عارف يا بلحه منك ليها لو حد فيكم فتح بقه طول السكه ؟
ــــــــــــــــــــــــــــــ هولٌع فيكم و فى السواق بأحقرها عود كبريت فيكى يا
ـــــــــــــــــــــــــــــــ جمهوريه , انا هنا البرنس ياض انت و هيا

انطلق الأوتوبيس فى ميعاده و قمت مطلع كتاب أقرا فيه , لازم استكنيص انا كمان , دول 7 ساعات سفر مش شويه, المهم انا طلعت الكتاب من هنا و قعدت أقرأ , لقيت عمو ابو جلمبو السواق قام طفى الأنوار و شغل فيلم فيديو فى الأوتوبيس , على سبيل الترفيه على الركاب مثلا

انا ( فى سرى برضه ): اه يا ابن الـ .........ـ

ما علينا , فضلت مفنجل عينى و بقرا على النور الضعيف اللى جاى من التليفزيوم

و فجأه ........ ـ
حصل اللى كنت خايف منه طول السكه .......
أنا بدأت أسقط

انا عن نفسى ببقى قرد طول النهار , لكن ساعه النوم دى معرفش أبويا , بدون مقدمات لقيتلك دماغى واقعه على صدرى و الكتاب مدلدل من ايدى , يا نهار مدوحس , طيب و المدام اللى جنبى دى أعمل فيها ايه , ده كده شويه شويه وهنام انا كمان على كتفها زى العيال ولادها

امسك نفسك شويه يا جحش , حبكت هيا ؟

من هنا لهنا من هنا لهنا مش قادر افتح عينى , قمت مدلدل نفسى على قدام و هاتك يا نوم , عموما انا لما صحيت قبل الغردقه بشويه لاحظت ان الست كانت بتبص عليا و بتبتسم , انا ارتحت .... كل اللى بيشوفونى و انا نايم لازم يضحك اصلا , يبقى الحمد لله مضايقتهاش و انا نايم

السواق ( ابن الـ .... ) : الغردقه يا اساتذه , وصلنا
راكب ( شخص معتوه ) : احنا هنوصل سفاجا امتى يا ريس
السواق ( ابن الـ .... ) : الغردقه يا اساتذه , وصلنا , اللى رايحين سفاجا يستنوا معايا
انا ( متســـــــــــــــائلا) : يا أبو الكباتن , هنروح سفاجا ازاى لما ننزل, هنركب الطفطف؟
السواق ( ابن الـ .... ) :الغردقه يا اساتذه , انا اسف , انتو 6 انفار و انا عندى ظروف
ــــــــــــــــــــــــــــــــــــــــــ معلهش , هركبكم مواصلات على حسابى لحد سفاجا
مجموعه من الركــــاب : ويك ويك ويك ويك
السواق ( ابن الـ .... ) : كاك كاك كاك كاك
انا ( مهدئــــــــــــــــــــا) : لأ لأ لأ يا ابو الكباتن , حضره البيه السواق راجل من دور
ـــــــــــــــــــــــــــــــــــــــــــــ
جدك ميصحش تغلط فى مامته بالشكل ده
السواق ( ابن الـ .... ) : لأ , مامى بقى لأ
انا (ناصحــــــــــــــــــــا) : لأ لأ يا برنس , مهما كان راجل كبير بس ميصحش يلسوعك
ــــــــــــــــــــــــــــــــــــــــــــ
على قفاك و انت واقف كده, يا خيبتك فى ولادك يا مصر

فى النهايه , و بعد مشاحنات من السواق و الركاب , و أنا قاعد اتفرج و خلصت ييجى قرطاسين لب و انا واقف فى قمه الإستمتاع , للأسف السواق اضطر يطاطى البصله و يكمل الجزء التانى من الرحله الى سفاجا
.
arni
9-12-2008

1 commentat:

Anonymous said...

جامده يا ارني
بس انت رحت الغردقه امتي ؟؟
Shift