الصيف فى مصر يعنى حاجه مختلفه لكل فئه من المصريين على حده
و فئات مصر ممكن تتقسم لنماذج
.
بابى عنده ماتش جولف و مامى بتلعب تنس
.
و دى فئه مش هتكلم عنها , عمرى ما اتكعبلت فـ حد منهم و انا محبش
اتكلم عن حد معرفوش
.
مارينا و للا شرم السنه دى ؟؟
.
فئه حلوه و مبسوطه , الدلع و المنجهه اللى يعرفهم المصرى انه يقضى
له يومين كل كام شهر فى الساحل الشمالى او الغردقه , و دى تنقسم لفئات
فرعيه
.
الاباء : الانتخه عالبحر و شرب الشيشه بالليل
الامهات : مكنتش ولا هبقى ام , فمتسألنيش الامهات بيعملوا ايه
الشباب : ميبقاش اسمه صيف ولا تبقى اسمها اجازه من غير لعب كوره
بس الكوره عالبحر ليها طعم تانى خااااالص
الكوره الكفر + الشورت الجينز + مفيش تى شيرت + حافى + اللعب
على الرمله + الاصحاب الحلوين = اجدع ماتش كوره هتلعبه فـ حياتك
زائد حاجات تانيه , منها السنكحه بالعربيه للفجر و لعب البلياردو و احيانا
الشيشه , لو ربنا كرم بحفله لعمرو دياب تبقى الحاجٌه داعيالك
.
! بينا على اسكندريه
.
و دى الفئه اللى تحت اللى فاتت دى على طول , و فى الغالب موظفين قدام
و غالبا تلاقى الواحد فيهم عنده عربيه نصر , يكوٌم الشنط فوق و المدام جنبه
و الاولاد ورا و بينا على اسكندريه
متعتهم فى الصيف لا تختلف بتاتا عن فئه مارينا , يمكن دول كمان كام سنه
يطلعوا للفئه بتاعه مارينا , بس فى ظل الاوضاع المنيله بنيله دى اظنهم هينزلوا
الفئه اللى تحت
.
حجزتلنا السنه دى يا مرسى ؟؟
.
فئه العمال و الموظفين الصغننين , بتوع مصايف الشركات و النقابات و الكلام ده
و اللى غالبا بيطلعوا جمصه او راس البر
.
الرجاله بيلاقوا نفسهم فى لعب الطاوله و الدومينو و البلبطه فـ المياه و الاكل عالبحر
الستات متعتهم فى الطبخ و شرا البضايع الاى كلام سواء من الاسواق هناك او من
السريحه عالبحر ..... الفئه دى غالبا بتتجوز متأخر و تخلف اولاد متأخر فلذلك ممكن
تلاقى راجل عنده 50 سنه و شايل بنت عندها 5 سنين وللا حاجه ... اه و الله ؟
مفيش هنا بقى فئه شباب , فى فئه اطفال
و الاطفال كلهم اولاد و بنات هناك بيبقى همهم حاجتين .... البلبطه فى المياه و تأجير
العجل بالليل
.
! ............. ما تشتريلنا مروحه بقى يا راجل الله يـ
.
فى البيت طول السنه ..... صيف و شتا , دول فئه الاخوه الحرفيين و صغار العمال
و الموظفين اللى مبيلاقوش مكان فى المصيف السنه دى
دول بقى متعتهم فى البتيخ الساقع
سلاااااام عالبتيخه و هيا خارجه من التلاجهو تدخل على مرحله التقتيع , بالنسبه
لتقتيع البتيخه , فى مدرستين للتقتيع
السكينه متاح للأختيار option قتع و ادينى شقه: و دى لما بيكونوا فى البيت و
دشها و ادينى حته : و دى فئه بنشوفها كتييييير جدا و مفيش داعى نقول كلام تحاسب
عليه الرقابه ..... يا ( تووووووووت ) ت
.
و تتعدد اساليب الاكل , فمنهم اللى بيقطعها مكعبات و ياكلها بالشوكه
و منهم اللى بيحب الظروطه فى الاكل , يمسك الشريحه بقشرها و يدب بوزه فيها
و غالبا بتلاقى ان مناخيره بتشارك بقه فى عمليه الاكل
.
اما الذ حاجه بقى فى البتيخ , البذر
فى ناس بتحب تسيب البذر , و تعمل بيه لب بعدين و تقضيها قزقزه ... سيبك منهم دول
.
يا سلاااااااام على القعده فى البلكونه و اكل البتيخ بالليل و تفته البذر على خلق الله فى
الشارع , متعه ما بعدها متعه , و بتعكس كمان قدره المصرى المعاصر على ممارسه
السياسه فى كل مواقفه فى الحياه
.......
و تلاقى التفته برضه داخله فى صميم الوجدان المصرى مثلا فى امثال زى
.
ابقى تعالى تف على قبرى لو فلحت ( النسخه المعدله من المثل ) ت
ابقى تف فـ وشى لو عبرتك تانى
.
باااااااس , الى هنا ينتهى الحديث عن المصرى فى الصيف بدل ما نلبخ فـ حاجه و نتاخد
مع اللى بيتاخدوا اليومين دول
.
استمسى باخير يا ابو كف رقيق و صغنن
.
arni
10-6-2008
0 commentat:
Post a Comment